Maak reg vir iets kort en kragtig! Die KKNK se Blitsteater bied 20-minuut-teater-ietse vir almal – van die kultuur-fynproewer wat doodeenvoudig nie kan uithou tot die volgende vertoning nie tot diegene waarvoor teater dalk iets onbekend is. Gryp ’n blitsvinnige happie van die talent-peuselbord, of staan ’n dag daaraan af as jy dit verkies. Blitsteater bring agt blitsvertonings na die Klein Karoo in ’n kraakvars formaat. Geniet ’n handjievol konseptuele werk, geskep deur bekende name in die teaterbedryf, asook opkomende kunstenaars wat pas weggespring het en wie se kreatiwiteit jou werklik gaan honger maak vir iets ekstra. Dis vinnig, dis vars en dis wegneem-teater op sy beste! 

Maar wag, daar’s meer! Wil jy bietjie ’n wilde perd opsaal? Kom steek jou hand in ons Lucky Pakkie, elke dag 13:00. Die inhoud is hoogs geheim – nes die lucky packets waarmee jy grootgeword het. Elke dag se Lucky Pakkie beloof ’n nuwe ietsie wat jy beslis nie wil misloop nie.