Vyf en vyftig jaar gelede, in 1970, debuteer twee digters wie se bundels opslae maak. Voorlopers en baanbrekers van hul generasie. Die ouderdomsverskil tussen hulle is byna twintig jaar: Wilma Stockenström (geb. 1933) en Antjie Krog (geb. 1952). Albei skrywers publiseer in verskillende genres en verander die wêreld van die Afrikaanse literatuur. Albei het meermale die prestigeryke Hertzogprys verower. Nou is daar twee splinternuwe boeke oor hierdie twee formidabele skrywers. Karen de Wet gesels met die twee redakteurs van die boeke – met Louise Viljoen oor Antjie Krog: ’n Ondersoekte lewe en met Ronel Foster oor Wilma Stockenström: Met my wysvingertop. Die boeke is deel van die SA Akademie vir Wetenskap en Kuns se huldigingsreeks vir Hertzogpryswenners.

Die feeskunstenaar, Henk Serfontein, se uitstalling, Die stomme aarde, is geïnspireer deur die ekopoësie en klipgedigte van Stockenström. Kom gesels saam oor dié gedugte twee vroue se werk en die insigte oor hulle in die boeke.