Die Prince Vintcent-gebou huisves weereens die grootste gedeelte van die visuele kunsuitstallings. Soos die Klein Karoo is hier ook baie uiteenlopende teksture binne ’n altyd veranderende landskap. Werke in uiteenlopende media dra by tot ’n ryk en multisensoriese ervaring. Bydraes sluit in gemeenskapsprojekte en intieme, sowel as monumentale werke deur kunstenaars van oor Suid-Afrika heen.

Die Creative Block, bestuur deur die Spier Arts Trust, verteenwoordig meer as 350 professionele kunstenaars van oor Suid-Afrika heen. Dit bied ’n prettige platform vir eksperimentering, en gevestigde kunstenaars neem steeds daaraan deel.

Elke kunswerk is ’n uitdrukking van die individuele kunstenaar se unieke onderwerp, materiaal en styl. Wanneer dit saam vertoon word, skep dit ’n eg Suid-Afrikaanse storie. Die projek is ideaal vir nuwe kunsversamelaars wat meer wil leer oor die kunswêreld en met ’n klein begroting die werk van uiteenlopende kunstenaars wil aanskaf. Kom ontdek 20 van hierdie wonderlike kunstenaars by vanjaar se KKNK!