Waag dit in ’n unieke virtuelerealiteit-ervaring, losweg geïnspireer deur die eeufees van Afrikaans as amptelike taal in Suid-Afrika. Deur die aanbieding word die ontwikkeling en verandering van die taal vasgevang en gevier deur middel van ’n multimedia-ervaring wat visuele kuns, musiek, poësie en tegnologie integreer. Besoekers kan ’n kombinasie van ’n fisieke en ’n skynrealiteit-ervaring (gemengde realiteit) verwag, met woudagtige natuurtonele deur die skilder Jaco van Schalkwyk, die woordkuns van Willem Boshoff, vervleg met klank en musiek geskep deur die komponis Jaco Meyer. Beide hierdie kunsvorme verhelder en ondersteun die Afrikaanse digkuns van Quaz Roodt en Bibi Slippers. Die verskillende media is verwerk tot ’n virtuele realiteit (VR) deur Herman Myburgh, VR-ontwerper, terwyl die algehele aanbieding deur Dineke Orton, kurator, beplan en saamgevoeg is.
