Veertig jaar lank het die vermaaklikheidskunstenaar Alistair Izobell verhoë aan die brand gedans en vir glimlagte op die gesigte van gehoorlede oor die land heen gesorg. Maar agter die skerms, weg van die liggies, het Alistair met donker gedagtes en emosies geworstel. ’n Selfdoodpoging in September 2023 het hom uiteindelik geforseer om sy gemoedstryd te konfronteer, en só begin sy reis na genesing; ’n verhaal van persoonlike groei wat hy in sy boek Broken to Heal vertel, in die hoop om ander gebroke mans te help.