In sy outobiografie vertel Franklin Sonn, struggle-ikoon en oudambassadeur na Amerika, van sy grootwordjare in Queenstown in die Oos-Kaap nadat hy in 1939 in Vosburg in die Karoo gebore is. Franklin was onder meer onderwyser, skoolinspekteur, skoolhoof van die Sekondêre Skool Spes Bona in Athlone, rektor van die destydse Skiereiland Technikon en president van die destydse Kaaplandse Professionele Onderwysunie (KPO). Hy het ’n leidende rol teen apartheid gespeel en hy is in 1995 deur pres. Nelson Mandela as Suid-Afrika se eerste swart ambassadeur na Amerika aangewys. Franklin was van 2002 tot 2009 die kanselier van die Universiteit van die Vrystaat en het meer as ’n dosyn eredoktorsgrade ontvang.