In 1966 ruk die moord van twee 12-jarige niggies, Issie Fourie en Petro Nel, die land. Hierdie is hul storie. Dit is ook die storie van André, Issie se broer, en die eed wat hy sweer om diegene verantwoordelik te vang. Dit sou hom 18 jaar neem.
Kabous Meiring gesels met ’n familielid om meer uit te vind oor die ware verhaal en hoe hierdie sonderlinge verhaal sy pad tot by kykNET gevind het. Hoe word daar te werk gegaan wanneer ’n dramareeks op ware feite gegrond is?
Niggies, kykNET se splinternuwe dramareeks, is gegrond op dié opspraakwekkende saak en ’n familie se soektog na antwoorde. Die rolverdeling bestaan uit ’n uitsonderlike ensemble met onder andere Beer Adriaanse, Carel Nel, Albert Pretorius, Tinarie van Wyk Loots, Jane de Wet en Erica Wessels. Die regisseur is Jaco Bouwer, wat onder meer vir die internasionaal bekroonde reeks Spinners verantwoordelik was. Die draaiboek is deur Saartjie Botha en Philip Rademeyer geskryf.
