In sy outobiografie Is dit jý? skryf die veteraanakteur Ian Roberts oor sy loopbaan wat strek van Kaapstad tot Los Angeles; van Shakespeare-teaterproduksies tot die Oscar-wennerfliek Tsotsi. Sy lewensverhaal is ’n meesterklas in die kuns van toneelspel. Hy was al die Bittereinder Sloet Steenkamp in Arende en Boet in die gewilde Castrol-advertensies, en in die fleur van die Afrikaanse televisie- en rolprentbedryf het hy saam met legendariese regisseurs soos Manie van Rensburg en Dirk de Villiers gewerk. Dié briljante storieverteller, met ’n stout humorsin, gesels met digter Danie Marais en laat die aap uit die mou oor wat alles agter die skerms op rolprentstelle gebeur.