In sy boek Boytjie skryf die televisieaanbieder Johnny Davids oor hoe sy ma hom as kind by sy dowe ouma en haar seun in Kleinvlei gaan aflaai het. Hier moes Johnny onder sy oom se vuiste deurloop totdat hy op ’n dag besluit het genoeg is genoeg; hy spring op ’n trein na Wellington. Hier by die Baron-gesin ervaar hy vir die eerste keer liefde in ’n warm huisomgewing en begin hy geleidelik heel word. Die gesin help hom om sy pa se familie in Walvisbaai te kontak, en in Walvisbaai leer hy om mens te wees. Johnny wen uiteindelik ’n sangkompetisie – die deurbraak in sy loopbaan. Dié inspirerende pa van drie is vandag ’n bekende gesig op die kassie, maar sy pad na sukses was nie sonder struikelblokke nie.