Ná 23 jaar in die tronk kan Roux Steyn moontlik op parool vrygelaat word, maar daarvoor moet hy een jaar sonder geweld skoonloop. Roux het egter reeds drie maal die “anger management”-kursus gefaal en boonop is hy ’n bendeleier en dwelmsmous. Hy het ’n magdom vyande wat nie kan wag om ’n mes in sy niere te plant nie. Die tronk is nie ’n plek vir teddiebere nie, maar daar is in elke monster ook ’n mens. In 2025 vier Stefaans Coetzee tien jaar sedert hy uit die tronk vrygelaat is. Die skrywer van Onbeskryflike genade vertel in sel ses ontnugterende stories oor die ongenaakbare lewe in die tronk. Maar hoewel Stefaans self 18 jaar in 13 tronke deurgebring het, is hierdie bundel samelopende kortverhale fiktief en slegs geïnspireer deur sy eie tyd in aanhouding. Stefaans gesels oor sy lewe, sy jongste boek en oor tien jaar van vryheid.