Nataniël sprei sy vlerke met ’n vertoning ewe geskik vir ’n antieke dorpsplein, ’n massiewe stadion of ’n spoggerige teater. Met unieke stories, splinternuwe musiek, invloede uit wêreldkulture en ’n paar klassieke oomblikke ondersoek hy en sy geselskap die geskiedenis van vermoëns en geleenthede, besoek ’n volstruisplaas, keer terug na ’n laboratorium honderd jaar gelede en peins oor tafeldek as ’n vakrigting. Vanjaar se KKNK word afgesluit met ’n uitsonderlike opelug-skouspel van musiek en stories, met ’n nie-verbale kinkel en ’n paar splinternuwe kunstenaars met unieke talente.