Twee van Suid-Afrika se voorste en hoog aangeskrewe instrumentale groepe, die Soweto String Quartet en ULTRACOUSTIC span kragte en kreatiwiteit saam in hierdie lekkerluister-vertoning. Geniet ’n energieke konsert vol verwerkings en oorspronklike musiek. Verskeie genres word gehoor, waaronder Ierse, sigeuner-, kwêla-, folk, Spaans-Latynse, kontemporêre flamenco-, klassieke en populêre musiek met polsende ritme. Tot Afrikaanse wysies, klub- en die 90’s se techno-musiek word instrumentaal vertolk. Jou voete gaan jeuk en jou tone omkrul van pure lekkerte. Jy gaan hierdie magiese vertoning vir lank onthou en die teater oorbluf verlaat.