Die bekroonde Isidlamlilo/The Fire Eater is ’n verbysterende solovertoning, aangebied deur die aktrise Mpume Mthombeni en teatermaker Neil Coppen, onder die vaandel van hul bekroonde Empatheatre. Die toneelstuk is geïnspireer deur die ware verhaal van ’n vrou wat ’n politieke sluipmoordenaar vir die Inkatha Vryheidsparty (IVP) was in die aanloop tot Suid-Afrika se eerste demokratiese verkiesing. Zenzile Maseko, die protagonis, is ’n 60-jarige Zoeloe-ouma wat in ’n klein vrouehostel in die middestad van Durban woon. Weens ’n administratiewe fout van die departement van binnelandse sake is sy dood verklaar en bevind haarself in ’n Kafka-agtige nagmerrie wat haar dwing om haar verlede as ’n sluipmoordenaar in die 1980’s in oënskou te neem – in die fel stryd van die IVP teen die ANC. Met behulp van magiese realisme en Afrika-volksverhale word KwaZulu-Natal se onstuimige geskiedenis van geweld en wraak belig, maar die fokus val veral op die merkwaardige veerkragtigheid van die protagonis en hoe sy vir haar ’n nuwe identiteit skep. Bekroon met die Woordtrofee vir beste prestasie: tegnies en ontwerp, beste prestasie: solo en beste oorspronklike Suid-Afrikaans teks by die Toyota Stellenbosch Woordfees (2024).