Gert Coetzee, gesoute joernalis en voormalige redakteur van Volksblad, gesels oor sy roman Lens wat tydens die politieke oorgangstyd in Suid-Afrika (1988-1990) afspeel. Die hoofkarakter, Chris Meyer, is ’n jong joernalis wie se ouers ’n dekade tevore in ’n motorongeluk dood is. Sy pa was ’n polities verligte raadgewer vir die destydse regering. Chris probeer die raaiselagtige omstandighede van die ongeluk ontrafel, en ontdek dat daar ’n verband is met die dubbele moord op dr. Robert en Jeanne-Cora Smit van 1977. Die woorde “RAU TEM” wat teen die muur van die moordhuis geskryf was, speel ’n sleutelrol in die verhaal.