Skop jou feesdag af met die perfekte kombinasie van ontspanning en energie by die meer intieme Castle Lager-verhoog, met Tarryn Lamb (12:00), Tino (13:30), Don Vino (15:00), Johan Liebenberg & Mauritz Lotz (16:30) en Bok van Blerk (18:00) wat die dag aan die gang te kry. Hulle gaan jou onder dié tent se dak in die regte luim kry vir die dag, met ’n kosstalletjie of twee en ’n kroeg vir ietsie koud wat nie te ver weg is nie.
Soos die son begin sak, skuif die Feesmark se hartklop na die Feesmark-verhoog. Maak gereed vir nog meer ietse vir die ore met Nataniël se skouspelagtige Duif., saam met Tracey-Lee Oliver, Wiehahn Francke, Nicolaas Swart, Dihan Slabbert, Charl du Plessis (klavier), Juan Oosthuizen (kitaar), Werner Spies (bas) en Peter Auret (tromme) wat jou op ’n klankreis neem tot laat.
