Liefdesbriewe is ’n ontroerende en tydlose drama oor die lewenslange verhouding tussen twee karakters, Melissa en André. Deur ’n reeks briewe, kaartjies en notas wat hulle oor vyf dekades skryf, onthul die soms geliefdes, soms vriende hul diepste gedagtes, drome en gevoelens. Hulle kommunikeer met mekaar deur angstige koshuiservarings, Europese avonture, mislukte huwelike en die hoogte- en laagtepunte van hul loopbane. Die toneelstuk is ’n tragikomiese ondersoek na verlore geleenthede, onuitgesproke liefde en die verwikkelde vriendskap wat hulle vir altyd aan mekaar bind. Arnold Vosloo en Elzabé Zietsman ken mekaar al 43 jaar. Hulle het op Elzabé se verjaarsdag in 1981 ontmoet: hy ’n eerstejaar- en sy ’n finalejaarstudent. Hulle was in 1982 laas saam op die verhoog, in Molière se klug Sganarelle.