Marion Holm is reeds vir 21 jaar ’n gunsteling onder KKNK-gehore sedert haar eerste eenvrouvertoning, Sussie is nou suur, wat in 2004 hier gedebuteer het. Haar nuutste eenvrouvertoning, Marion Monroe, is benoem as beste nuutgeskrewe Afrikaanse teks by Momentum Beleggings Aardklop (2024) en het daarna blitsvinnig by die Toyota Stellenbosch Woordfees uitverkoop. “What’s in a name? That which we call a rose by any other name would smell as sweet.” Aldus Shakespeare. So, is Marion Holm steeds Marion Holm, al noem mense haar Nicole Holm? Bly Marion ’n vrou al noem mense haar meneer? Wat maak vir Marion Marion? Sy vertel stories met haar tipiese eerlikheid en heerlikheid om haar punt oor te dra. Daar is ’n paar nuwe karakters, maar ou bekendes soos Nakkie is steeds op die verhoog.