Die Hertzog-bekroonde skrywer Ingrid Winterbach bied in haar jongste teaterstuk ’n oneerbiedige blik op die Suid-Afrikaanse geskiedenis, kolonialisme, ontbering en privaat plesiertjies. J.R. en sy vrou, Maria, is per skip op pad na die Kaap om ’n verversingstasie te vestig. Blussing-Fermaak, ’n verstekeling op die skip, dreig om die sending te kaap en die skip na die Kongo te neem om van daar met slawe handel te dryf, of dalk ’n kruidenierskettingwinkel te open. Teatergangers kan hulle gereed maak vir ’n drama waarin alles nie altyd is wat dit voorgee om te wees nie. Met Winterbach se eiesoortige humor, en ’n rolverdeling met topakteurs onder spelleiding van Tinarie van Wyk Loots, beloof dit om ’n hoogs vermaaklike teaterervaring te wees. Die teks is oorspronklik as leesteater voorgelê by die KKNK se Teksmark in 2023.